آج کی بات

ایاغ و مینا، خمار و مستی، فسوں، سراپا غزال آنکھیں

ہیں محوِ حسنِ خیال، یا ہیں خیالِ حسن و جمال آنکھیں

زمینِ دل پر گُلاب مہکے ، یہ معجزے ہیں کسی نظر کے

کریں مزیّن مرے فلک کو ، ستاروں سی لازوال آنکھیں

ہر ایک پل ہے نیا تجسّس ۔۔۔۔۔۔۔۔۔۔۔ وہی تلوّن نظر نظر میں

ہر ایک لمحہ کوئی تحیّر ۔۔۔۔۔ ہر ایک لحظہ سوال آنکھیں

جو ملتفت ہوں ، تو قطرہ قطرہ رگوں میں ٹھنڈک اترتی جائے

سوادِ جاں میں کریں اُجالا ۔۔۔۔۔۔۔۔۔ یہ مشعلوں سی کمال آنکھیں

ہے جسم و جاں میں یہ مُشکباری، یہ نغمہ سنجی انہی کے دم سے

مہکتی ہر دم ۔۔۔۔۔۔۔۔۔ سراپا سرگم ۔۔۔۔۔۔۔۔ یہی ہیں وہ بے مثال آنکھیں

یہ کس کی چشمِ خمار آگیں سے ۔۔۔۔۔۔۔۔۔ جا ملی ہے نگاہ، نسریںؔ

میں وجد میں ہوں یا کر رہی ہیں کسی کی دُھن پر دھمال آنکھیں

Go to Link